الخميس، 19 أكتوبر 2017 02:32 م
المباشر

مرتضى منصور يتسبب في إنتحار مشجع زمالكاوي قهراً

مرتضى منصور
مرتضى منصور
محمد البنهاوي

بعد تراجع نتائج نادي الزمالك وإنهيار كل الألعاب، بدأت جماهير الزمالك في التحسر على أحوال فريقها الذي حقق أحد أسوأ مواسمه منذ تأسيسه وأنهارت الألعاب الجماعية تماماً، وسط إصرار رئيس النادي على بيع أكثر من نصف الفريق والتعاقد مع صفقات وصفتها الجماهير "بالفرز الثاني".

"سوبر كورة" يرصد حوار تخيلي بين مرتضى منصور ومشجع زمالكاوي "مفروس:"، علماً بأن هذا الحوار لم يتم في الواقع.

 

مرتضى: أنا اللي رجعت هيبة النادي والبطولات وعملت إنجازات مكنتوش تحلموا بيها

المشجع: انجازات ايه وبطولات ايه، دا كمال درويش خد 11 بطولة في 3 سنين ومذلناش كدا.

مرتضى: يابيه دوري وأربعة كأس و"صوبر" ونهائي أفريقيا.

المشجع: هو نهائي أفريقيا بقى بطولة، وبعدين أنت واخد 3 كأس بس خلتهم أربعة أزاي.

مرتضى: ونسيت أني رجعت كل الألعاب الجماعية.

المشجع: بأمارة ما خرجت صفر بطولات في كل الألعاب السنة دي.

مرتضى: يابيه دي مؤامرة عشان موسم الإنتخابات مشارك فيها أحمد سليمان وممدوح عباس وهاني شكري وعبد الله جورج.

المشجع: أه وابو مصعب الزرقاوي وكلينتون وبوش ماشاركوش معاهم.

مرتضى: يابيه أنا اللي رجعت هيبة النادي وخليته قوي.

المشجع: كل خناقاتك اللي دخلتها مع اتحاد الكرة خسرتها لا عيدت ماتش ولا بطلت حكم هددته ولا أي حاجه كله كلام في الهوا.

مرتضى: والرموز اللي كرمتهم بجناين ويفط في كل حته في النادي أنكروا دي كمان.

المشجع: كرمتهم أزاي دا انت شتمت كل رموز النادي من أول حلمي زامورا لحازم إمام وميدو وابو العلا وعبد الحليم ، أنت بتهين أي زمالكاوي.

مرتضى: يابيه حلمي زامورا كان خامورجي وميدو هربان وحازم ماداش النادي حاجه وعبد الحليم إخوانجي.

المشجع: أنت فالح بس تكرم رموز الأهلي.. دا الزند اللي حكم في قضية إسلام الشاطر لصالح الأهلي وأعلن في كل حته أنه أهلاوي سميت مكان بأسمه في النادي، وكرمت صالح سليم وأهنت حلمي زامورا.

مرتضى: يابيه أنا رجل دولة يهمني انهي الفتنه بين الجمهورين دا أنا رفضت أجيب حسام غالي عشان تاريخه في الأهلي وقولت أتمنى يعتزل بالفانلة الحمراء .

المشجع: زعلان أن كابتن الأهلي هيمشي، وبتسرح شيكابالا كابتن الزمالك اللي متربي في النادي، وبعدين كل شوية تقول هجيبلكم مدرب عالمي وماشوفناش غير كلام.

مرتضى: ما أنا جيبتلكم ميدو مش أنتوا مسميينه العالمي.

المشجع: وهو ميدو أجنبي

مرتضى: أنا قلت عالمي ما قولتش أجنبي أنتوا اللي مابتركزوش في كلامي.

المشجع: ضيعت على النادي 300 مليون جنيه بسبب صفقات مضروبة جبتها انت وعيالك

مرتضى: وهو أنا لما أجيب لاعب ويطلع فاشل المفروض اسيبه أزاي.

المشجع: خلاص ما تحملش النادي ثمن فشلك ادفع فلوسه من جيبك مش أنت اللي جايبه.

مرتضى: يابيه المدربين هما اللي مشوا كل اللاعيبة اللي سبناها.

المشجع: ميدو وإيناسيو ومؤمن وفيريرا قالوا انك أنت اللي مشيتهم.

مرتضى: ماتجبليش سيرة فيريرا دا هربان ومدرب فاشل وأنا اللي كنت سبب في الدوري والكأس.

المشجع 18 مدرب فشلوا مافيش ولا واحد كويس.

مرتضى: يابيه باتشيكو خد علبة حلاوة المولد وهرب، وفيريرا جري ورا فلوس قطر، ومؤمن بيفتي وحلمي بيحب ويكره وإيناسيو قابض رشوة من أحمد سليمان، وباكيتا بيظلم وماكليش شخصيته ضعيفه أعملكم ايه.

المشجع: حولت النادي لأكاديمية للدوري السعودي وبعت كل اللاعيبة.

مرتضى: يابيه أنا عامل ثورة كروية الموسم الجاي وهجيب لاعيبه تاخد كل البطولات.

المشجع: والثورة الكروية دي هتتعمل بخالد قمر وابراهيم عبد الخالق رايح تجيب لاعيبه فشلت في أندية بتصارع على الهبوط وتقولي هتعمل بيهم ثورة.

مرتضى: ليه ونسيت أشيمبونج وكاسونجو ورزاق ولا أنتوا مابتفتكروش غير الوحش.

المشجع: كاسونجو أبو 15 مليون اللي جبته مصاب، ولا أشيمبونج اللي جبته وعارضه للبيع ورزاق اللي اشتريته مرتين واتنصب عليك فيه.

مرتضى: أنتوا مالكوش غير ممدوح عباس اللي راح جبلكم أجوجو ب40 مليون جنيه.

المشجع: ونسيت أنك جبت مايوكا بـ45 مليون ودافع فيه سمسره 300 الف دولار.

مرتضى: كل دا مايهزش شعره من راسي وهنجح وهقعد على قلبكم أعضاء الجمعية العمومية بيحبوني

المشجع: بيحبوك عشان الكرسي والشمسية بكرا تخلي الزمالك زي الأوليمبي والترسانة وأبقى أفرح بالكرسي والشمسية.

مرتضى: برده قاعد على قلبكم ولو مش عاجبك عندك الخرارة بتشربوا منها بقالكم 3 سنين.

وهنا انتحر المشجع حزناً وقهراً على ناديه.

 

 

تعليقات (6)
ضاضا والعيشة المرة
بواسطة: علي
بتاريخ:

رغم انه مكتوب بسخرية بس والله دا اللي بيحصل فعلا

موضوع مستفز
بواسطة: لبني علي
بتاريخ:

هو انتو ليه واخدين موقف من مرتضى على طول ربنا يخليهولنا في النادي دا اهم صفقة للاهلي في العشر سنين اللي فاته هههههه

هيخربها
بواسطة: سسو
بتاريخ:

مرتضي والعيشه المرة ايامه كلها سوداء بجد ضحكتوني علي ابو مصعب الزرقاوي

لا لرحيل ضاضا
بواسطة: مسعد
بتاريخ:

خليكوا كدا طفشوا في الراجل لحد مانلاقيش حاجه نضحك عليها

شر البلية ما يضحك
بواسطة: عبد الكريم أحمد
بتاريخ:

والله شر البلية ما يضحك بجد مقال ممتاز

من اهلاوى : بالعند فيكم وفى الحملات المعموله ضده هاينج بإذن الله
بواسطة: أبو على
بتاريخ:

الراجل هايقطع نفسه لعيبه بيجيب ومدربين وبيجيب وبيساعد المدربين فى الاختيار علشان مايتعبوش وليل ونها ر يعنى مداخلات إذاعيه وتليفزيونيه وطوال النهار مع عمل الانشاءات والطوب والزلط والحديد والاسمنت وناحر فى قلبه وبيروح المباريات ويشتم فى اللعيبه والجمهور والله دى حرقه دم الراجل حارق نفسه علشان الزمالك وإحنا كأهلاويه بنشجعه وبنطلب من اهلاويه عموميه الزمالك وهم الاكثريه أن يرحمونا ويساندوه ضد الهجمه التتريه عليه طيب لو مانجحش (هانهرأ )على مين هههههه

اضف تعليق