الإثنين، 24 فبراير 2020 | 01:53 ص

أحمد كشرى لـ سوبر كورة: واقعة تزوير وش السعد.. حمادة صدقى رفض يودينى الزمالك علشان أروح الأهلى.. حسام حسن اتخانق بسبب أهدافى.. سخنت التوأم على بعض بسبب "كوكتيل أغانى".. جدي كان طباخ الكشري للملك فاروق

الثلاثاء، 21 يناير 2020 09:00 ص
أحمد كشري ومحمد عراقي أحمد كشري ومحمد عراقي
حوار محمد عراقي - تصوير محمود فخري

غيرت قوام منتخب جيبوتى بسبب متعب والصقر

عدت من الاعتزال بعد 3 سنوات وحصلت على لقب الهداف

جدى كان طباخ الكشرى للملك فاروق

رضا عبد العال رمى تعبان فى مغطس اللاعبين وعور كابتن ماهر بطقطوقة

فيلكس كان بيتعالج بالسحر

ديانا ماتت كلمة السر فى تريقة اللاعبين عليا

التسديد على الطائر توكيل الخطيب

رفضت الانتقال للزمالك لأن الأهلى "التوب"

رميت القميص فى وش تسوبيل وخرجت من التمرين

تعرضت للقرص والخربشة والعض فى المباريات

خت فلوس فى المصرى بعد مانشيت الزمالك اتسحر كشرى

تاريخ كبير لأحمد كشرى نجم الأهلى والكرة المصرية السابق، بعد أن لعب مع الجيل الذهبى للفريق الأحمر، ونجح فى فرض اسمه كواحد من أفضل المهاجمين، وشارك فى بطولة أمم أفريقيا عام 1996 مع منتخبنا الوطنى.

توجه أحمد كشرى لمجال التدريب بعد اعتزاله، ونجح فى قيادة العديد من الفرق والمنتخبات ليفرض نفسه كواحد من أهم المدربين على الساحة حالياً قبل أن يستقر به الحال فى نادى سوهاج والذى تولى مسئوليته الفنية مؤخراً، كشرى فتح قلبه وأجرى حواراً لا تنقصه الصراحة سرد فيه العديد من ذكرياته مع الساحرة المستديرة وكشف رأيه فى العديد من الملفات الهامة، وجاء نص الحوار كالتالى:

بداية ما هو السر وراء تلقيبك بـ"كشرى"؟
 

ده لقب عائلتى كلها، وأصلها أن جدى الكبير أوى كان طباخ الملك فاروق، وهو اللى عمله أكلة الكشرى، وعشان كدا طلع لقب كشرى على عيلتنا.

كيف جاءت بدايتك مع الكرة؟
 

زى أى لاعب فى الشارع والحوارى وكنت مكسر بيتنا ومحلات الشارع، والدى كان رياضى فى مجال كمال الأجسام والمصارعة، ورحت بعد كدا نادى الخالدين فى الدراسة، اختبر فيه والمدرب مشانى ولعبت بعد كدا فى الدرب الأحمر.

ما هى قيمة أول مرتب حصلت عليه؟
 

أول مرتب كان 30 جنيها فى الشهر والكلام ده كان فى نادى المقاولون العرب.

82388994_199425421238119_8665733669488427008_n

وكيف بدأت مشوارك مع المقاولون؟
 

المهاجم الأساسى فى المقاولون ساعتها كان مزور، فالنادى مشاه وده أدانى الفرصة أنى ألعب مهاجم خصوصاً إنى كنت بلعب فى الفترة دى فى الناحية الشمال، ولعبت للمقاولون 7 سنوات وتم تصعيدى للفريق الأول فى سن الـ17 عاماً، ولكن النادى مشانى وأنا عمرى 21 سنة.

وأين انتقلت بعدها؟
 

انتقلت للشرقية للدخان لمدة موسم وكان جيلى الزمالك فى وقتها مقابل 5 آلاف جنيه وأتمرنت بالفعل مع الزمالك، ولكن إدارة الشرقية للدخان رفضت، خصوصاً أن كابتن محمد عامر وكان معاه كابتن حمادة صدقى كانوا أهلاوية ومنعونى من الانتقال للزمالك فى وقتها، ووعدونى أنهم هيودونى الأهلى وجبت فى الموسم ده 30 هدفا مع الدخان.

وماذا حدث بعد ذلك؟
 

كابتن عامر كلملى الأهلى وقالوله إنهم عارفنى بس لازم الخواجة هاريس يوافق وعملولى ماتش ودى مخصوص عشان يشوفونى وسجلت فى الأهلى فى المباراة دى، وبعدها قالولى عايزينك الصبح ورحت لكابتن رمضان ومكنش فى دماغى أنهم ياخدونى فوجئت لما رحت لقيت المهندس عدلى القيعى ومضونى.

وماذا كان رد فعلك؟
 

رد فعلى أن أغمى عليا وسقطت على الأرض وفقدت النطق لمدة دقائق وافتكرتهم بيشتغلونى ومضيت 5 سنوات.

ومن كان يقود هجوم الأهلى فى وقتها؟
 

أفضل مهاجمين فى الدورى المصرى حسام حسن وأحمد فيلكس ووليد صلاح الدين، ومشى فى الوقت ده أيمن شوقى، وبعد كدا بسنة جه على ماهر.

ما هى أبرز ذكرياتك مع حسام حسن؟
 

أنا كنت لعيب بلط بحب أجيب أجوال غير فيلكس كان يبقى الجول فاضى ويباصى لحسام، فكان حسام بيحب يلعب مع فيلكس وكان أول مباراة ليا مع هامبورج فى ألمانيا وكانوا كسبانين 2/0، وحسام حسن جاب جول وبعدين جبت أنا جول التعادل بعد منزلت علطول، وكان هولمان المدير الفنى للفريق فى وقتها وبعدين لعبنا ماتش ودى تانى سجلت فيه 6 أهداف وبعدين فى المباراة اللى بعدها جبت 5 أجوال، فحسام دخل فى الأوضة زعق واتخانق مع اللاعبين وقالهم أنتوا مش عايزين تلعبولى راح رضا عبد العال جالى وقالى من الآخر كدا لو رقصت الفريق كله والمرمى خالى أرجع وأديها لحسام عشان يسجل هو، وتعرض ساعتها لإصابة قوية فى وتر اكيليس.

82649818_1332831186909927_5595281263477915648_n

وما ذكرياتك مع التوأم فى منتخب مصر؟
 

مرة كنا مع منتخب مصر وحسام وإبراهيم وحازم إمام بيلعبوا بلاستيشن، وقالولى تعالى العب معانا فلعبت مع أنى مش بعرف العب، وفى آخر ثانية جبت جول.. لقيتهم اتجننوا وقالولى أنت بتعرف تلعب وعندك بلاستيشن ومشيت ودخلت أوضتى جريو ورايا وكسرو باب الغرفة عشان يلعبونى ويكسبونى وياخدوا بتارهم وفعلا عملوا كدا.

ومرة كنا فى الأتوبيس كان حد مشغل شريط كوكتيل سألت مين اللى عمله حسام قالى أنا، راح إبراهيم من ورايا قالى لأ أنا وفضلنا نسخنهم لحد متعصبو على بعض وأنا كنت بحب أسخنهم.

وماذا عن رضا عبد العال؟
 

أخف دم لعيب بجد، جاب مرة تعبان ورماه فى مغطس اللاعبين ومرة اشتغلنى وقالى إن فيه أسس فى النادى وأن كابتن صالح سليم قايلنا على لعبة لازم نلعبها عشان نكسب وأنا صدقته وقولتله ماشى قام فتح أيدى وحط فى أيدى ضفدع حى نط فى وشى خلانى أجرى 5 كيلو بعيد عنه.

وفى مرة كان رضا حاطط فى دماغه أنه هيلعب ومرو وحدة الخواجة قال إنه احتياطى فرضا أضايق جداً وكابتن أحمد ماهر كان دمه خفيف راح قاله أنت زعلان أنك قاعد احتياطى راح رضا قاله أه طبعا أنتوا ظلمة قالو طيب متزعلش يا رضا أنت مش احتياطى أنت برا الاسكور خالص وخد الوردة دى راح رضا مسك طقطوقة وحدفها على كابتن أحمد ماهر وعوره.

وماذا عن فيليكس؟
 

لاعب أفريقى بس مصرى وكان مسمى ابنه أشرف، وفاكرله موقف مقدرش أنساه مره أيده اتكسرت كسر مضاعف دكتور مجدى عبد العزيز قاله هتحتاج شهرين قام قالة لأ أدينى إجازة أسبوع وأنا هرجعلك تانى راح بلده ورجع لقينا أيده سليمة وساعتها الأطباء كانوا هيتجننوا بعد معملوله الإشاعات ولقوا أيده سليمة وطبعا أتعالج بالسحر.

وما هو أبرز مقلب تعرضت له؟
 

مرة كنا نزلين على الفطار مش فايق ولقيتهم كلهم بيقولوا "ديانا ماتت" فقولتلهم ديانا مين وأنا مش فاهم ومسكونى ساعتها وقعدوا يتريقوا عليا وفضلوا مسكين ليا كلمة "ديانا ماتت" فترة طويلة.

وماذا عن أبرز المواقف مع كابتن الخطيب؟
 

مرة قالى تعالا نلعب على الجول واحد يرفع الأوفر والتانى يسدد فكنت أرفعله الكرة ياخدها على صدره ويسدد على الطاير أنا حاولت أعملها كتير معرفتش رحت قولتله مستحيل دى توكيل بيبو بس فهو كان لاعب عظيم.

كيف رحلت عن الأهلى؟
 

جالى عروض احتراف فى مونشنجلادباخ الألمانى وكنت ساعتها هاخد 800 ألف دولار وده ساعتها كان رقما كبيرا بس ساعتها كان المدير الفنى هو تسوبيل ومكنش فى بينى وبينه وفاق فبوظهالي، لأنه مكنش يحب اللاعبين النجوم ومكنش بيحب وليد صلاح الدين ورضا عبد العال بردوا.

83089272_114217383254632_8331461170909151232_n

تلقيت عروض أخرى؟
 

تلقيت عرضا من الزمالك ولكنى رفضت الانتقال إليه، لأن الأهلى كان التوب وكان فيه فرق كبير بينه وبين أى نادى مصرى تاى، وجالى بعدها عرض من نيوشاتل السويسرى اللى انتقلت إليه بعد كدا.

وماذا حدث بينك وبين تسوبيل بعد ذلك؟
 

علاقتنا كانت متوترة وأتذكر أنه أثناء توجيهى مسك قميصى ودفعنى وكان بيوجهنى غلط كمان، وقلعت القميص ورميته فى وشه وطلعت من الملعب والجماهير هتفتلى ووقفت معايا، كان خنقنى وأنا كنت بحرجه كل ما بنزل بجيب أهداف، وأول ما الأهلى جددله مشيت ودى غلطة حياتى لو كنت قعدت كنت هكون أفضل مهاجم فى مصر لأن حسام بعدها مشى بسنة.

من المدافع الذى كنت لا تحب مواجهته؟
 

سعيد العراقى كان لاعب بيضرب جامد، وكان الاتحاد فيه لاعب بيخربش ومرة حط أيده جوا الفانلة وبيقرص ويعض ويخربش ومرا كابتن ثابت خدنى وودانى لجمال الغندور كان الحكم ساعتها وشهدوا على الموقف.

وما هى أبرز أعمال السحر التى عاصرتها؟
 

كان هناك فريق من الكونغو رفضوا دخول غرفة خلع الملابس فى ستاد القاهرة ولما رحنا عندهم لقيناهم عمللنا بخور ودجل على الجول ولكن الحمد لله كسبناهم.

ومن الحارس الأبرز الذى واجهتهم؟
 

نادر السيد وسعان الصغير.

82511256_161672741784155_4332924370126110720_n

وأفضل دويتو؟
 

رضا عبد العال وأسامة عرابى.

وما هى أبرز خناقة عاصرتها؟
 

كانت بين عصام الحضرى وحسام حسن وكانت جنايه فى ألمانيا واللاعيبه كلها وقفت تحوش وكان سببها فاتورة تليفون الأوضة حسام حسن بيتكلم كتير والحضرى مش بيتكلم وحسام قاله نقسمها بالنص، والحضرى رفض وألمانيا كلها اتفرجت علينا والحضرى فى الآخر دفع النصف.

وكيف جاء اعتزالك؟
 

لعبت فى أسمنت أسيوط والجونة فى آخر مسيرتى الكروية وصعدتهم وبعدين قررت الاعتزال ودربت فى النادى الأهلى وبعد 3 سنوات نادى النصر كلمنى ورجعت على الدور التانى وخت لقب هداف الدورى لقيت أندية فى الممتاز بتكلمنى قولتلهم لأ وكملت مسيرتى التدريبية.

83229029_786210675231795_1765281676629377024_n

موقف لا تنساه فى التدريب؟
 

أكيد تدريب منتخب جيبوتى فكانت تجربة صعبة، اللاعبون كانوا قصيرين ورجليهم رفيعة، وكنا هنلاعب مصر بعد 20 يوما وقولت دول هيلاعبوا إزاى أحمد حسن وعماد متعب ورفضت المنتخب ده، وعملت ماتشات مع فرق المقدمة فى الدورى والمفاجأة أن فرق الدورى بقت تكسب المنتخب 5 و6، فعملت منتخب تانى فى 2008 وظهرنا أمام منتخب مصر بشكل جيد.

وما هى المواقف الأخرى مع جيبوتى؟
 

أتعلمت اللغة الجيبوتية عشان أعرف أتواصل مع اللاعبين، ومرة وإحنا بنلاعب أوغندا وكانوا شيلنا فوق رأسهم وواحد من لاعبى فريقى جاب ترانزستور وإحنا مسافرين قالى ده أتسرق ودخلت الغرف وجبت كرسى وطلعت فوق دولاب لقيته جوا قميص كان واحد سرقه.

وماذا عن المواقف فى الأندية الأخرى؟
 

فى نادى المصرى كنت أغلى لاعب فى مصر حازم إمام كانا بياخد 100 ألف وحسام حسن كان بياخد 50 ألفا وأنا لما رحت المصرى كنت باخد 250 ألف جنيه، ودى كانت مفاجأة لأنى مكنش عايز أروح ولما طلبت رقم جامد فوجئت أنهم وافقوا لقيت أخويا اللى كان رافض ضربنى بكوعه عشان أوقع بس بعد كدا مكنتش باخد فلوسى، إلا لما نكسب كانوا بيقولولى كسبنا وألوى دراعنا ومرة كنا بنلاعب الزمالك وجبت جول وأتعادلنا معاهم ونزل مانشيت الزملكاوية اتسحروا كشرى قاموا بعتولى فلوسى.


لا توجد تعليقات على الخبر
اضف تعليق

مسابقة التوقعات


توقع مباريات أمم أفريقيا