الخميس، 04 يونيو 2020 | 01:00 ص

أحمد أبو مسلم: فيه لعيبة مكنتش تحلم تلعب أهلي وزمالك ودلوقتي بتضرب اللي أكبر منها.. الأحمر رفض بيعي لفينورد بمليون يورو والقيعي قالي عايز الجماهير تدبحنا.. السوشيال ميديا سبب التعصب وبتسخن اللعيبة على بعضها

السبت، 28 مارس 2020 10:00 ص
احمد ابو مسلم احمد ابو مسلم
حوار سليمان النقر

 

فيه لعيبة مكنتش تحلم تلعب أهلي وزمالك ودلوقتي بتضرب اللي أكبر منها

شيكابالا كان بياخد 4 و6 وميقدرش يبص لجماهير الأهلي ولما وصل ضربات جزاء بيعمل حركات مشينة

الأهلي رفض بيعي لفينورد الهولندي بمليون يورو والقيعي قالي عايز الجماهير تدبحنا

رفضت اللعب للزمالك بعد تسريحي من الأهلي لأني من عيلة أهلاوية

السوشيال ميديا سبب التعصب وبتسخن اللعيبة على بعضها

مفيش لاعب يصلح يلعب للأهلي غير طاهر طاهر

ابراهيم عبد الصمد وراء رحيلي عن الأهلي ورجعت له بـ700 ألف جنيه

لعبت مع الفنان أحمد فهمي في الأهلي وسرحونا مع بعض

أحمد رفعت مكنش يعرف اني في مزارع دينا لما كان بيدربنا وكان عايز يشتريني بـ5 آلاف

جوزيه كان بيخنق عليا انا وعبد الوهاب عشان بيحب جلبرتو

جوزيه حملني مسئولية هدف اتحاد جدة وساب الحضري اللي ضرب جمعة بالبوكس

شوقي غريب سبب اختفاء جيل برونزية مونديال الأرجنتين بس شرطه الظالم

ثابت البطل عمل معايا موقف رجولي لا انساه وقالي "الاهلي مبيرميش عياله"

جوزيه شتمنا بعد الفوز على الزمالك 6/1

معلول نمبر وان في مصر ورمضان صبحي افضل لاعب

 

أحمد أبو مسلم نجم الأهلي السابق وواحدا من أبرز لاعبي الجبهة اليسرى في مصر خاض تجارب ناجحة سواء في مصر بقميص الأهلي ومزارع دينا والاسماعيلي والإنتاج الحربي وسموحة وتليفونات بني سويف، أو في الاحتراف بقميصي ستراسبورج الفرنسي وليرس البلجيكي، وكان من أبرز اللاعبين في الجيل الذهبي لمنتخب الباب مواليد 1981 والمتوج ببرونزية كأس العالم 2001 بالأرجنتين.

تحدث أبو مسلم عن كواليس جديدة ومثيرة في مسيرته مع الكرة وكشف تفاصيل جديدة عن رحيله من الأهلي ثم العودة إليه وأزماته مع مانويل جوزيه، ورفض بيعه إلى فينورد الهولندي رغم وصول عرض مغري، وموقف خالد في ذاكرته مع الراحل ثابت البطل مدير اكرة الأسبق بالقلعة الحمراء، دوره في صناعة أهم إنجازات الكرة المصرية والمساهمة في تتويج منتخب الشباب ببرونزية كأس العالم 2001 بالأرجنتين، وكان معه هذا الحوار.

 

كيف ترى مصير النشاط الرياضي في مصر مع انتشار فيروس كورونا؟
 

الناط في مصر مفيش وقت يستكمل والاولمبياد اتاجل والدوريات متوقفة وعندك دور كامل لم يلعب والدنيا صعبة وانا قريت برة لان بتابع الدوريا الاوروية، حتى قبل نزول قرار الايقاف.

 

هل ترى حلول بديلة لاستكمال النشاط الرياضي؟
 

لا مفيش حلول بديلة السنة تعتبر منتهية، وحتى لو هتعمل هتدخل على موسم جديد، ولو دخلت على موسم جديد هل هتلعب الدور التاني بس وبعد كده تكمل، شايف انها مستحيلة، والموسم السنة دي كل سنة وانت طي بنسبة 99% وده في العالم كله لانك بتتكلم عن حياة او موت.

 

من تراه الأكثر ضررا من توقف النشاط؟
 

الاكيد اللي في مجال الكرة اللاعبين وعمال اللبس والملعب، ممكن اللاعبين عقودهم شغالة ولكن المتضرر كل دول بيتاثر بياخد له الفين او تلاتة الاف جنيه مرتب وبيحاول ياخد له مكافأة فوز والامور هتبقى صعبة عليهم وهم الاكثر ضررا.

 

وما مدى الضرر الذي سيطول المنتخبات القومية؟
 

الضرر على المنتخبات كلها الاولمبياد تأجل لمدة سنة ، وماتشات الناشئين وقفت والكل في البيت ، واللاعبين كلهم في البيت والدوري الممتاز متوقف والفومة هتنزل وهيبقى فيه زيادة اوزان لانه مفيش حركة، وهتلاقي ناس كتير زادت وعلى ما ترجع تاني هتحتاج وقت طويل.

 

بدايتك مع الكرة .. أين بدأت ومتى صعدت للعب مع الأهلي؟
 

بدأت 8 سنين مع الأهلي ولعبت 4 سنين حتى 12 سنة وبعدين لغوا سن 81 بسبب لعب كأس العالم مع الدكتور محمد علي للمشاركة مع كأس العالم في مصر وضموا الفريقين مع بعض ولغوا المسابقة الخاصة بسني وخدوا واحد من فرقتي هو حسين ظاظا وكان معايا محمد سمارة لاعب الاتحاد السكندري السابق وشرريف اكرامي مشي برضه والممثل أحمد فهمي كان معي في الفريق، كنا جيل كامل.

764cd236-bffd-4ebd-9158-404efc4436d1
الفنان أحمد فهمي بقميص الأهلي

 

وماذا فعلت بعد ذلك؟
 

الكل تفرق بعد ذلك وانا رفض اروح الزمالك لأن هناك أسماء راحت الزمالك وقلتلهم انا اخواتي كلهم اهلاوية وانا اهلاوية، وكابتن ابراهيم عبد الصمد هو اللي مشانا كلنا وبعد كده استقريت على اللعب لنادي النيل وهناك قابلت الكابتن فتحي عماشة وكان ماسك مدير فني لفريق 81 بمزارع دينا وكان كل ما نلعب مباراة ودية ضد الأهلي، كنت أنا وحسين أمين ولاعب آخر اسمه رامز، وكانوا يمنحونا أجازة لعدم اللعب ضد الأهلي خشية من تعاقده معنا ، وكان يرغب في انتقالنا إلى مزارع دينا، وأقنعني باللعب لمزارع دينا مقابل الحصول على ألف جنيه ونصف عام 96 ولعبت وعمري 14 و15 سنة معه وبعدها دخلنا منتخب الشباب مع شوقي غريب.

9805f0c8-0ad3-48e3-a866-e3fa25397bb9
فريق الاهلي مواليد 1981
 

انضميت لمنتخب الشباب من مزارع دينا؟
 

بالضبط كابتن عوض عبد الرحمن مسئول منطقة القاهرة عن البراعم، وكان محمد الشرقاوي هو المسئول عن المنتخبات وكابتن عوض كلم جهاز المنتخب، ومن أول يوم انضممت فيه للمنتخب أقنعتهم بمستواي، وأول مباراة في بطولة الميريديان بجنوب إفريقيا قدمت فيها مستويات قوية ، وبعدها لعبت مباراة ودية مع المنتخب ضد مزارع دينا وكابتن شوقي غريب كان بيهزر مع كابتن أحمد رفعت ، وقتها لأن احمد ممتاز الظهير الأيسر كان لديه إصابة في الأنكل ولديه مشكلة في هذه الجبهة وكنت ألعب على اشرف يوسف لاعب مزارع دينا وقتها ولعبت مباراة طيبة للغاية عليه ، ومكنش حد عارفني غير عامل الكور في مزارع دينا.

 

وكيف صعدت للفريق الأول بمزارع دينا؟
 

كابتن شوقي قال لكابتن رفعت ايه رايك في الباك لفت ده و"يقصدني انا"، مش انت مش عندك مشكلة في المركز ده، فقاله اه والله واحمد ممتاز اتصاب، والكلام كان قدامي، وكابتن شوقي قاله الباك لفت اهو قدامك قاله تاخده بـ5 آلاف ورد عليه كابتن رفعت موافق ونده على الاداري قاله هات 5 آلاف هنخلصه دلوقتي وقاله كابتن شوقي والله اخلصهولك حالا ده لاعب عندك في مزارع دينا واتفاجئ بده كابتن رفعت، وبعدها قالي انت عند مين قلته كابتن عوض نده على حسين الاداري انه يديني لبس التدريبات و10 الصبح بكرة يبقى معانا ومينزلش تحت تاني، ولعبت ضد القناة اول مباراة وكسبنا 3/0 وكنت بلعب على أحمد العجوز نجم الاسماعيلي السابق وأحمد رضوان لاعب الأهلي السابق، وقالي انت وش الخير علينا ولعب سنة معاه وبعدها الاهلي رجعني تاني.

 

متى عدت للأهلي؟
 

عدت للأهلي وسني 18 عاما بعد لعب تصفيات أمم افريقيا مع المنتخب، وكابتن صفوت عبد الحليم كان سافر الى اثيوبيا لمتابعة اللاعبين المميزين في بطولة امم افريقيا تحت 17 سنة ، وكان بيتابعني انا وجلبرتو، وطلب مقابلتي في فندق الاقامة، وقلت كنت بلعب في الاهلي ودربت مع كابتن شطة وخالد جاد الله وكابتن ابراهيم عبد الصمد مشاني بسبب الغاء السن بتاعي، وقالي انت عايز ترجع الأهلي ورديت عليه قلت له اتمنى وده بيتي ونفسي ارجع، وقالي الناس كلها مبسوطة بيك وبعتوني مخصوص عشانك، واول ما تنزل مصر هتيجي النادي الاهلي.

 

وماذا حدث بعد ذلك؟
 

فضلت فترة بعدها لم يفاتحني الأهلي وقبل السفر إلى الأرجنتين بـ4 أيام كابتن عدلي القيعي كلمني في التليفون يبلغتي برغية الاهلي في ضمي ومحمد حسين عثمان رئيس نادي مزارع دينا كلمني وقالي تعرف تطلع من معسكر المنتخب دلوقتي قلت له صعب، راح اتصل بكابتن شوقي غريب عشان يستأذته اطلع من المعسكر واتصل بي كابتن شوقي وقالي روح ساعة خلص وتعالى وكان عارف بالتفاصيل، وروحت وقعت وخد الاهلي الاستغناء بتاعي، وخلصوني من مزارع دينا بـ700 ألف جنيه وخدت 250 ألف حنيه على 5 مواسم.

 

وكيف كانت بدايتك مع الأهلي؟
 

وملعبتش للاهلي ولا مباراة وسافرت الارجنتين وجالي عرض من فينورد الهولندي بمليون يورو بعد كأس العالم وعرضته على عدلي القيعي لكنه رفض وقالي انت عايز تدبحنا انت ملعبتش ولا لبست الفانلة الحمراء وانت مكسر الدنيا في كأس العالم والجماهير هتدبحنا لو سبناك ، والناس كانت موجودة في مصر المدير الرياضي لفينورد ووكيل الأعمال الفرنسي برونو، والقيعي رفض المبدأ من الأساس رغم انه كان ممكن يزيد لو فتحوا باب التفاوض، ومدير فينورد قاله احنا عايزينه عشان تابعناه ومحتاجينه في هولندا ورد عليه كابتن عدلي وقاله احنا محتاجين باك لفت، وانتهى الموضوع على كده.

 

هل شاركت مع الأهلي بعد العودة من كأس العالم بالأرجنتين؟
 

بالفعل شاركت مع الأهلي أساسي لحد ما جالي رباط صليبي ورجعت العب تاني وخلال اصابتي بالرباط الصليبي حصل موقف مع كابتن ثابت البطل منساهوش ، كان جدع جدا وساعدني، ستراسبورج الفرنسي كان عايز يشتريني وقت اصابتي بالصليبي وعرض على الاهلي انه يشتريني كده ويتكفل بعلاجي من الصليبي ويرجعني العب من تاني، وقلت لكابتن ثابت عمرها ما تحصل انهم يطلبوا لاعب مصاب، رد عليا وقالي الاهلي مبيرميش عياله وهرجعك تبقى زي الفل ووعد مني همشيك، وبعدها رجعت ولعبت كأس العالم في اليابان مع الاهلي عام 2005، ومن الصدف الغريبة ان اول مباراة كان مباراة اتحاد جدة في السوبر المصري المصري وآخر مباراة مع الأهلي ضد اتحاد جدة ايضا في كأس العالم للاندية ودي حاجة عمري ما انساها.

 

وماذا فعلت بعد العودة من اليابان؟
 

بعد ما رجعت من اليابان جوزيه كان حاططني في دماغي انا والراحل محمد عبد الوهاب ومكنش بيلعبنا يديني وية وشوية يطلعني برة، رغم ان جلبرتو كان مصاب في وتر أكيلس.

 

 هل كان هناك مشكلة لك مع جوزيه؟
 

بالعكس كان بيحبني جدا وكنت بلعب اساسي بس الفكرة عشان جلبرتو كان بيلعب في المكان ده وكان ماشي كويس معاه، ومش عايز يغيره من المكان ده وكان بينزلني شوية ويروح خانقني وكان بيعمل كده مع عبد الوهاب وكنا عارفين ده وبنفضل نضحك عليه انا وعبد الوهاب، حتى مرة كابتن حسن شحاتة كان ضمني لمعسكر المنتخب انا وعبد الوهاب، وجوزيه كان هيتجنن عشان بنروح المنتخب من غير ما بنلعب اساسيين، كأن حسن شحاتة بيعانده لما بياخد لاعبين مش بيلعبوا اساسيين.

 

 

وكيف انتقلت الى ستراسبورج؟
 

بعد العودة من اليابان قعدت مع كابتن محمود الخطيب خلال تناوله الغدا في مطعم النادي وقلت جوزيه عايز يخلي شكلي وحش وانا عايز امشي ، وحملني مسئولية هدف اتحاد جدة في كأس العالم باليابان رغم ان الحضري طلع على الكورة وضرب دماغ راس وائل جمعة بالبوكس والكرة نزلت لمهاجم اتحاد جدة وحطها جون، انا مالي بده؟ وهو مشى سعيد عبد العزيز وياسر ريان ولما بيحط حد في دماغه هيبطله، وقلت له بعد اذنك يا كابتن دول اخر 6 شهور ليا في الاهلي وجايلي عرض من ستراسبورج بـ200 الف يورو كان المفروض 100 للأهلي و100 ليا مقدم عقد ، وتنازلت عن المبلغ بتاعي عشان امشي، وبعد كده الخطيب قالي خليهم يبعتولي فاكس وهسيبك تمشي، وقبلها كنت في معسكر المنتخب وقلت لكابتن حسن انا مش هكمل مع الراجل ده ، وقلتله الفاكس هيجيني بعد اسبوع وهمشي وكانوا عايزني في ستراسبورج عشان العب بدل ظهير ايسر الفريق الايفواري الي كان هيلعب مع منتخب كوت ديفوار في امم افريقيا بمصر 2006، ودي الحالة الوحيدة اللي اقدر امشي فيها وتفهم كابتن حسن كلامي وتركي للمعسكر.

 

سر اختفاء نجوم جيل 81 رغم تتويجهم برونزية كأس العالم للشباب؟
 

فيه مشكلة قابلت الجيل فيها ناس ليها يد في كده وفيه ناس قصرت في حق نفسها زي حسين امين ووائل رياض ومحمد العتراوي وابو المجد مصطفى، وكان فيه شرط ظالم لكابتن شوقي غريب لازم عشان تيجي منتخب اولمبي تكون بتلعب في النادي بتاعك وخلاه يغير في شكل الناس، فيه ناس كملت زي حسام غالي وانا ومحمد شوقي ومحمد محسن ابو جريشة والباقي مكملش ودي سنة الحياة، وفيه سوء تخطيط من اتحاد الكرة كان لازم يحافظ على الجيل ده واحنا ما شفنا ده، وفيه ناس مكنتش بتلعب عشان كده وقعت، بالعكس عندك منتخب المانيا بيجيبك حتى لو مش بتلعب زي هازارد في بلجيكا في وقت ما مكنش بيلعب اساسي بس كان بيجي المنتخب

 

تقييمك لتجربتك الاحترافية؟
 

احلى فترة في عمري وخدت احسن لاعب في شهر مارس 2007 وجالي عرض من موناكو بس مدير التسويق بتاع ستراسورج مشي وراح موناكو وكان عايوني هناك، بس رئيس نادي ستراسبورج رفض ان امشي وحظنا وحش اننا هبطنا درجة تانية، وقالي انت ملكش غير 6 شهور بس معانا وعايزينك عشان نصعد تاني.

 

كيف كانت علاقتك بالجيل الذهبي للأهلي في ذلك الوقت، وما الذي ميزه عن غيره من الأجيال؟
 

علاقتي طيبة بالجميع وأحترم كل الناس ولم أفتعل مشكلة داخل الأهلي ، ولكن قرار السفر كان الأفضل في حياتي، خصوصا اننا قفشنا انا وجوزيه وعشان هو عندي وكان ممكن نقفش مع بعض.

 

وماذا حدث معك بعد العودة من الاحتراف؟
 

رحت الاسماعيلي شهرين بس ومشيت عشان عندهم الماديات صعبة وروحت الانتاج الحربي خدت لقب هداف الفريق مع كوابينا يارو وبعد كده خلصت الانتاج روحت سموحة بـ500 الف جنيه وبعدها مكملناش سنة وحصلت حادث بورسعيد، بعد 6 شهور توقف روحت ليرس البجيكي.

 

هل فكرت في العودة للأهلي بعد رحيلك عنه؟
 

كان فيه اتصالات من حسام البدري مدير الكرة بعد 6 شهور من انتقالي لستراسبورج ولكن رفضت بسبب رغبتي في استكمال احترافي بخلاف رفض نادي ستراسبورج عرض موناكو، وبعدها لم يتصل بيا من الاهلي احد.

 

من أفضل لاعب في مصر بالوقت الحالي؟
 

رمضان صبحي لانه تطور غير ما شاهدناه في انجلترا ولديه خبرات ويلعب لصالح الفريق وكان بيموت نفسه في طولة امم افريقيا تحت 23 سنة.

 

ما تقييمك لأداء فايلر مع الأهلي؟ وهل تؤيد تجديد عقده؟
 

إلى الآن مقنع في الظروف الحالية ولا أقيس المدرب بالدوري المصري، لان اي مدرب يستطيع التتويج بالدوري المصري، وأقيس بافريقيا والمباريات الكبيرة، ونوعا ما هو مقنع ولكنه لم يصل الي اعلى شيء، وانا مع تجديد عقده لانه لا وقت للتغيير حاليا وهو الأدرى بالفريق كما أنه تولى المهمة وهذه الأسماء موجودة ولم يكن يعرفها، ولكنها سيجلب الصفقات التي يحتاجها في الفترة القادمة.

 

هل يوجد تشابه بين فايلر وجوزيه؟
 

لا نهائيا ، جوزيه يعرف اللاعب المصري واسلوبه ويعرف كيف يعنفه ، بينما فايلر هادئ للغاية عكس جوزيه الذي كان ممكن يدخل غرف الملابس يولعها، واللاعب المصري مينفعش يبقى المدرب هادي معاه، جوزيه كنا كسبانين الزمالك 6/1 ومسكنا شتمنا كلنا، وقالنا لما يكون اليوم بتاعك حاول تكسب فيه .

 

هل تتفق مع ما فعله الأهلي مع عاشور وإكرامي؟
 

اللي شايفه انه اي حد ميدخلش في شغل المدير الفني ولكن الناس المفروض تكلم المدير الفني وتقوله ده لاعب كبير وابننا ويتجدد له سنة كتكريم ويفهم عاشور انه مش هيلعب كنوع من التكريم، ومينفعش يطلع بالشكل ده مش حلوة، واعتبر السنة دي اخر تجديد في حياته.

 

بحكم أنك ظهير أيسر سابق ما تقييمك لأداء معلول ومن أفضل ظهير أيسر بمصر؟
 

معلول في مصر عدى وبيقدم مستويات عالية وهو نمبر وان في مصر وبيخلص المباريات الكبيرة ومن اللاعبين المميزين في مصر وبعدين محمد حمدي من اللاعبين المميزين وفه حسين السيد من اللاعبين المميزين اتمنى يعود الى الاهلي وهو الافضل من بعد معلول، ومحمود وحيد "هاف لفت مش "باك لفت".

 

هل ترى أن معلول كان سببا لتعرض لاعبي الجبهة اليسرى بالأهلي للظلم؟
 

لا خالص هي الكرة كده منافسة وانت موت نفسك ووحيد جات له الفرصة ولعب ، انا لما جيت كان فيه سعيد عبد العزيز وركبت عليه ومشي وبعدها ياسر ريان كان بيلعب اوقات في المركز ده.

 

ما تقييمك لأداء محمود الخطيب بالأهلي؟
 

اداء جيد والأمور تسير بشكل جيد وهناك استقرار ولم نرى مشاكل وهو لديه خبرات كبيرة، لكن مش عاجبني في قطاع الناشئين لازم كون اقوى من كده ومفيش الا سعد ونيدفيد وهاني، وبدر رجب اللي طلع الجيل ده قبل ما يمشي، واتمنى يرجع ويستعينوا بالخبرات مع احترامي للناس الموجودة.

 

ما تعليقك على أحداث مباراة السوبر ومن تحمله المسئولية؟
 

اللاعبين يتحملوا المسئولية لانها عديمي الوعي بسبب المستوى التعليمي ومش عارفين قيمة الفانلة اللي بيلعبوا بيها وفيه ناس مبتحلمش تلعب في الاهلي والزمالك ودلوقتي بتتكلم وبتضرب لعيبة اكبر منها، يعني ايه عبد الله جمعة يعمل حاجة زي كده مع جماهير الاهلي، وامام عاشور ازاي يضرب حد اكبر منه، على ايامنا كنا بنعتذر لبعض واحنا جوه الملعب، والسوشيال ميديا لما حد يعمل الغلط الناس تفرح بيه ويبقى ترند ودي قلة الادب، والسوشيال ميديا هي سبب التعصب بيخلوا اللعيبة تسخن على بعضها.

 

ما مدى رضاك على قرارات اتحاد الكرة بشأن مباراة السوبر؟
 

فيه حاجات غلط انك وقفت كهربا لاخر الموسم وشيكابالا عمل حاجة مشينة وتديله 8 مباريات بس، والمقارنة ما بين العقوبات صعبة، وشيكابالا لاعب كبير مش صغير وعيب اللي عمله، وبعدين بتعمل لمين لجماهير الاهلي، كنت بتاخد  4 و6 ومكنتش تقدر تبص للجماهير دلوقتي لما توصل ضربات جزاء تعمل كده ،ومش عاجبني سواء اللي حصل سواء من لاعبي الاهلي او الزمالك.

 

من يستحق العودة للأهلي من اللاعبين المعارين؟
 

انتى عودة كلا من حسين السيد وعمار حمدي واكرم توفيق ومحمد شريف وصلاح محسن وناصر ماهر وكنت اتمنى عدم بيع احمد حمدي.

 

من اللاعب الذي تتمنى أن تراه بقميص الأهلي في الموسم المقبل؟
 

مفيش على الساحة لاعب يشدني انه يلعب في الاهلي، ولازم اللي يجي يكون احسن من اللي عندك وعندك اليو ديانج، والوحيد اللي يصلح هو طاهر محمد طاهر.

 

 


تعليقات (1)
مين انتا يا ابو مسلم
بواسطة: حسن زمالك
بتاريخ:

كلمني عن تاريخك وبطولاتك اللي انتا أخدها الاول وبعد كده تعالي اتكلم عن سيدك شيكابالا اللي 30 الف او اكتر بيشتموا عايز يكون رد فعلوا ايه يسقفلهم انتا لو مكانوا هتعمل ايه ولا صحيح مزارع دينا ملهاش جمهور

اضف تعليق

الأكثر قراءة

مسابقة التوقعات


توقع مباريات أمم أفريقيا