الجمعة، 05 يونيو 2020 | 02:20 ص

علاء ميهوب فى حوار خاص: مفيش حد ينفع بطل القرن غير الأهلى.. رفضت الزمالك بمبلغ خيالى.. عمرو السولية أحسن لاعب فى مصر.. صورة الخطيب وتركي الأفضل فى 2019..الزمالك مع كارتيرون حاجة تانية..والأحمر كان يستحق السوبر

الإثنين، 18 مايو 2020 10:00 ص
حاوره حسام الحاج

الخطيب كاريزما زي التتش والمايسترو وأسطورة في الكورة زي بيليه ومارادونا

محسن صالح رمز كبير وعودته للقلعه الحمراء أسعدتني كثيرا وشابو مجلس بيبو

أفريقيا في الجزيرة وأي قرار غير تتويج الأهلي وليفربول بالدوري مصيبة

فشل التجربة الألمانية يعنى نهاية الرياضة ولو لقاح كورونا مظهرش مبكرا هتبقى "كارثة"

عاشور لازم يعتزل وسليمان يستاهل الـ11 مليون.. وصالح ربنا يهديه.. وفتحي زعلني جدا

فايلر مدرب عالمي وبيفكرني بجوزيه.. والسايس عندي أحسن من الجوهري

الوحش ظلمني.. وحسن حمدي رئيس نادي بفكر أوروبي

جوزيه كان يعشق الصخرة وتريكة.. ولكن بركات كان عنده حاجة تانية خالص

مصطفى شوبير حارس مصر القادم.. وعودة شريف وناصر وعمار وأكرم مفيدة

كينو وسيرينو وموليكا ثلاثة سوبر ستار.. وحجازي وصبحي نجوم من العيار الثقيل

البدري الأحق بتدريب المنتخب.. والتوأم أخواتي وأهلاوية متعصبين

ديانج قصة وحكاية.. وساسي فاكهة الزمالك.. والسولية ـحسن لاعب في مصر

فاروق جعفر وصفوت "أدارجية كورة" وعبدالحميد والتوأم ومنصور فرقوا كتير في تاريخ الزمالك

رئاسة إيهاب الخطيب لقناة الأهلي قرار صائب.. مرجان جندي مجهول في النادي

أسامة نبيه خانه التعبير  في أزمة التفويت.. والأبيض مع كارتيرون حاجة هايلة

الفانلة الحمراء تمنها غالي.. والعمل في الأهلي في أي منصب شرف وحمل تقيل

يعد من أفضل المواهب والأساطير الكروية فى مركزه كلاعب وسط فى تاريخ الكرة المصرية والنادى الأهلى أطلق عليه ألقاب عديدة كان أبرزها بلاتينى مصر وعلاء موهوب، بدأ حياته بالمشاركة فى مونديال العالم للشباب عام 81 وكان أحد نجوم المنتخب الوطنى الحاصل على بطولة كأس الأمم الأفريقية 86 إلى أن ختم حياته الكروية بالصعود والمشاركة فى مونديال 90.

حصل على 20 بطولة بواقع 19 بطولة مع النادى الأهلى 7 دورى عام و5 كأس مصر و2 دورى أبطال أفريقيا و3 كأس الكؤوس الأفريقية وبطولة أفروآسيوية والدورة التنشيطية عام 90 وبطولة أمم أفريقيا مع المنتخب الوطنى 86، بالإضافة لحصوله على العديد من الجوائز كأفضل لاعب خط وسط فى مصر من خلال اختياره عبر العديد من الاستفتاءات الرياضية فى فترة الثمانينات فضلا على كونه كان أحد هدافى مباريات القمة بين الأهلى والزمالك.

فلا أحد ينسى من جماهير الكرة المصرية هدفه التاريخى بقميص النادى الأوليمبى فى مرمى أحمد شوبير حارس الأهلى الأسبق والذى أبكى به الملايين من الجماهير الحمراء.

تواصل سوبر كورة مع أيقونة المارد الأحمر فى حقبة الثمانينات علاء ميهوب فكان هذا الحوار الحصرى والمختلف..

بداية أين كابتن علاء ميهوب فى زمن الكورونا؟
 

موجود الحمد لله فى منزلى زى أغلب المصريين مع أسرتى وملتزم بشكل كبير بكل التعليمات والاحترازات الطبية المطلوبة.

ماذا عن هواياتك المفضلة منذ إيقاف النشاط الرياضى؟
 

 القراءة ومشاهدة بعض المباريات القديمة وبعض البرامج والمسلسلات وأداء بعض التمارين والمواظبة على رياضة المشى خلال فترة الصبح.

حدثنا عن إيجابيات وسلبيات تلك الفترة؟
 

بصراحة مفيش إيجابيات يكفى إغلاق المساجد فى كل العالم العربى ده أمر صعب جدا بصراحة، عشان كدة من وجهة نظرى السلبيات أكتر بكتير من أى إيجابية فبجانب الحرمان من صلاة الجماعة فى المسجد تحرمنا برضوا من حاجات كتير ومن أهمها الذهاب للجيم وزيارة الأصدقاء والمقربين لى فى مقر النادى الأهلى بالجزيرة، بالإضافة إلى والدتى وأخواتى فى الحوامدية.

رأيك فى عودة الحياة الكروية فى بعض دول أوربا وعلى رأسها ألمانيا؟
 

شىء إيجابى طبعا وأتمنى نجاح التجربة خصوصا أن المعايير والترتيبات اللى بتحصل مش سهلة، خصوصا أن هناك أندية عديدة فى أوروبا تلقت بعض الصدمات بشأن إصابة نجوم لديها.

وهل تعتقد أن أى فشل للتجربة الألمانية سيكون لها أثر سلبى على عوده النشاط فى مصر؟
 

بكل تأكيد ومش فى مصر بس فى كل دول العالم اللى عندها أمل فى عوده نشاطها الكروى والرياضى فربنا يستر.

وماذا لو تم إلغاء الدورى الألمانى مثلا بعد أسابيع من إقامته؟
 

هتبقى كارثة ورسالة مرعبة لكل رياضى فى العالم مفادها أن مفيش كورة ولا رياضة تانى مادام لم يظهر أى لقاح أو مصل أو علاج رسمى يقضى على هذا الوباء اللعين.

هل أنت مع عودة الدورى باحترازات طبية أم مع الإلغاء؟
 

طبعا.. أى رياضى يتمنى عودة النشاط ولكن باحترازات طبية وتنظيم وترتيبات على أعلى مستوى من الاحترافية والحماية لكل عناصر اللعبة وعشان كده بتمنى نجاح التجربة الألمانية لأنها هتفرق كتير قوى فى مستقبل الكرة فى العالم.

تعليقك لو تم إصدار قرار بإلغاء النشاط وحرمان الأهلى من الدورى؟
 

طبعا إلغاء الدورى وكل المسابقات وارد لأن هناك دول عديدة مثل هولندا وبلجيكا وفرنسا والكاميرون وفنزويلا وانجولا وكينيا قررت إلغاء مسابقاتها أما بالنسبة للقرار الذى أرفضه بشده فيتلخص فى حرمان الأهلى من لقب الدورى طبعا لأن هيبقى قرار ظالم وغير منطقى.

فهل يعقل مثلا أن الاتحاد الإنجليزى يرفض منح ليفربول لقب الدورى لو قرر إلغاء المسابقة؟! فضلا عن أغلب الدول إللى قررت الإلغاء أعلنت عن بطل مسابقة الدورى.

رأيك فى الحملة التى يتعرض لها الأهلى من أجل حرمانه من الحصول على درع الدورى؟
 

مع احترامى للجميع الحملة غير منطقية وشكلها بايخ قوى بصراحة، خصوصا أن اللى بيتكلموا على حرمان الأهلى من الحصول على درع الدورى مش مقتنعين بكلامهم زى ما هما برضو مقتنعين تماما بأن الأهلى هو نمبر وان فى مصر والشرق الأوسط.

كيف ترى مستقبل الكرة المصرية حال اتخاذ قرار الإلغاء من الدولة؟
 

طبعا أى رياضى فى مصر هيكون زعلان وهتبقى خسارة فادحة للأندية وكل العاملين فى المجال الرياضى لكن لازم نكون راضيين بأى قرار يتم اتخاذه من الدولة وبالتحديد من المسؤولين فى وزارتى الصحة والشباب والرياضة لأنهم الأدرى بالمصلحة العامة والحالة الصحية للشعب المصرى.

تعليقك على فتح مسئولى الزمالك ملف نادى القرن التاريخى؟
 

قولا واحدا النادى الأهلى بالأرقام والنقاط والتاريخ.. النادى الأهلى هو نادى القرن الماضى والحالى ده غير أن الأهلى يعد بالبطولات أكثر أندية العالم حصولا على البطولات حاليا وأعتقد أن الموضوع ده قتل بحثا بقالوا 20 سنة سواء من مسئولى الكاف أو الفيفا.

كيف رأيت قرار صالح سليم بالاعتذار عن المشاركة فى بطولات أفريقيا؟
 

 

ضده بكل تأكيد لأن الأهلى على الأقل لو كان شارك مكنش الزمالك هيلعب فى البطولة الأفريقية أبطال الدورى بصفته حامل اللقب المحلى وده طبعا فتح الباب لفوز الزمالك بأربع بطولات تقريبا فى تلك الفترة، بسبب هذا القرار غير الصائب، خصوصا أنه حرم الأهلى من الفوز بتلك البطولات واللى بدلناها بالبطولات العربية.

نخرج من أزمتى كورونا وملف نادى القرن.. ونسالك عن تجربتك التدريبية مع نادى الترسانة وأسباب رحيلك المفاجئ؟
 

تجربة قصيرة جدا وأنا عن نفسى استفدت من تلك التجربة، وفى إيجابيات وسلبيات وأنا خرجت من النادى بكل احترام وعلاقتى طيبة بالجميع ورئيس النادى الحاج طارق السعيد وقدامى النادى.

وهل تعرضت لمؤامرة؟
 

لا طبعا مفيش مؤامرات ولا حاجة خالص ولو كان فى حد تآمر أو كان بيحارب شغلى فربنا يسمحه، وهى تجربة وراحت لحالها بإيجابياتها وسلبياتها ويكفى أنى عملت فرقة فى وقت قصير جدا بشهادة الجميع واعتذرت بشياكة وهدوء بعد أول مباراة مباشره بالدورى.

كابتن علاء.. أنت صاحب قرار الرحيل من منصبك كرئيس اللجنة الفنية بالنادى الأهلى؟
 

نعم.. أنا اللى اعتذرت للكابتن محمود والكابتن تفهم طلبى وكان لآخر لحظة متمسك بوجودى ودة شرف كبير ليا، خصوصا أن كابتن الخطيب بالنسبالى حاجة كبيرة جدا ومثل أعلى.

هل لو عاد بك الزمن هتاخد نفس القرار أم ستبقى فى منصبك؟
 

أى قرار بيتاخد بيبقى فى توقيته ليه ظروفه ونصيب وإن كان طبعا الخروج من النادى الأهلى بيخلى الواحد متضايق طبعا، لأنه زى الشخص اللى بيسيب بيته وبيسافر مثلا فالموضوع صعب بدون أدنى شك.

حدثنا عن كواليس رحيلك من النادى الأهلى؟
 

كابتن محمود ده أسطورة وشخصية قمة فى الاحترام والأخلاق وأنا شخصيا وأى حد فى جيلى كان حلمه يلعب بجوار الكابتن فى الملعب فبيبو ده حدوتة لن ولم يتكرر موهبته اللى تضاهى بيليه ومارادونا وبلاتينى وبوشكاش وشخصية قمة فى الأدب والتدين وعلى فكرة على المستوى القيادى والإدارى أحد أفضل من إدارة النادى عبر تاريخه، فالكلام بخصوص أسباب رحيلى ومش رحيلى ليس له قيمة وإحنا تربينا فى النادى أن الأهلى فوق الجميع واللى بيحصل فى الغرف المغلقة بيفضل سر أبدى ليوم الدين.

وهل حدثت أى اتصالات مع كابتن خطيب؟
 

كابتن محمود هاقولك تانى ده عشرة عمر وأخ غالى ونضيف ودايما فى بالنا وعقولنا وقلوبنا وطول فترة مرضة طبعا بكلمة وببعتلوا على الواتس آب وبطمئن عليه وعلى أسرته الكريمة وأسامة حسنى زوج بنته شخصية جميلة ونجم كبير أنا كمان دائم السؤال والاطمئنان عليه وعلى الكابتن.

تعليقك على كل ما كان يكتب عن توتر علاقتك بالخطيب؟
 

كلام غير صحيح بالمرة ومن كان يروج لهذه الأخبار كان هدفه سيئا وخبيثا، لأن الكل يعلم محبتى الكابتن ومحبة الكابتن لعلاء ميهوب، أما موضوع القناة ده غلط. القصة وما فيها أن المرحوم خالد توحيد كان هيبدأ فى تجديد البرامج وتوفى فى نفس التوقيت، ولهذا السبب رئاسة القناة أتغيرت وأنا كنت فى نفس الوقت أتعاقدت مع قناة أخرى.

وهل حصل أى لوم من أى مسئول فى النادى؟
 

إحنا فى النادى الأهلى أسرة واحدة وعندنا مبادئ وقيم ومفيش لوم ولا زعل مع حد، وعلاقتى بالجميع فى النادى والمجلس وأعضاء النادى فوق الممتازة فهما كلهم أخواتى طبعا.

ماذا لو طلب منك كابتن الخطيب العودة مرة أخرى؟
 

طبعا هوافق بدون تفكير، لأن أي كابتن فى النادى الأهلى وعلى رأسهم كابتن الخطيب علمونا أن النادى الأهلى لما يطلبك على الفور تلبى الندا بدون نقاش ولا تفكير.

 رأيك فى اختيار الأهلى لكابتن محسن صالح؟
 

أنا أول حاجة عايز أشكر كابتن الخطيب بصراحة على حسن اختياره للكابتن محسن صالح لرئاسة اللجنة بعد اعتذار كابتنا الشيخ طه، وأنا على المستوى الشخصى كنت فى غاية السعادة بعودة كابتن محسن لبيته، وهو كابتنا وكان لعيب كبير ومدرب ومحلل فنى ذكى وعظيم صاحب فكر وأخلاق ومحترم، وعلى فكرة كابتن محسن إدارى كمان محنك وشاطر ومعاه طبعا كابتن زكريا وخالد بيبو اتنين نجوم وأصحاب فكر، فبصراحة شابو لكابتن الخطيب ومجلس الإدارة فى قرارهم ده.

وهل أنت راضٍ عن إدارتهم لملف التجديد للثنائى فتحى ووليد سليمان؟
 

بكل تأكيد اللجنة أدارت الملف باحترافية وعملت اللى عليها طبعا، أما بخصوص رحيل فتحى فده عرض وطلب اللجنة بشهادة فتحى أشاد بها وبطريقتها فى التفاوض، فالناس عرضوا مبلغ ومدة تعاقد واللاعب رفض وبهدوء، فأين المشكلة والتقصير من الكباتن؟!

رأيك فى رحيل فتحى وهل وليد سليمان يستحق هذا المبلغ وإكرامى كان محقا فى قراره؟
 

بالنسبة لفتحى فأنا على المستوى الشخصى بحبه جدا ففتحى لاعب راجل وأهلاوى جدا بس رحيله عن الأهلى بالشكل ده خصوصا بعد العرض المادى المحترم اللى اتعرض عليه زعلنى جدا لأنى كنت أتمنى إنهاء مشوار فتحى الكروى عندنا فى النادى.

أما بالنسبة لوليد فطبعا يستحق تقدير النادى ليه، أما عاشور فقرار اعتزاله ده قرار خاص به بس أنا بشكل شخصى أتمنى أن يختم حياته فى النادى أو الاحتراف، أما إكرامى فخرج من الباب الكبير وبشكل احترافى وشيك.

هل ترى أن الثلاثة الكبار فى حقبة التسعينات تعامل بنفس تعامل مسئولى النادى الحاليين مع عاشور؟
 

لا طبعا، كابتن خطيب وكابتن محسن تعاملوا باحترافية وإنسانية وتقدير أكبر مع عاشور بعكس ما حدث معنا.

رأيك فى هجوم مجدى عبد الغنى ومصطفى يونس على إدارة النادى؟
 

لا تعليق.. ولكن أنا على المستوى الشخصى بزعل جدا من أى هجوم على النادى وأى مسئول فيه، خصوصا لو كان الهجوم من ابن من أبناء النادى وكباتنا وأصدقاء غاليين ليا.

 وجهة نظرك فى قرار رحيل أزارو والإبقاء على جيرالدو؟
 

وجهة نظر تحترم طبعا، وفى النادى الأهلى أتعلمنا أن المدير الفنى هو صاحب القرار الأول والأخير، وأنا شايف أن مستر فايلر أزمته مع أزارو فى طريقة لعبه وهو حتى شرحها باستفاضة فى حواره مع كابتن شوبير وسيف زاهر، وأعتقد أن جيرالدو مع الإعلان عن نهاية الموسم هيتم إعارته أو بيعه.

هل توافق فايلر على قراره الخاص برحيل أزارو؟
 

مستر فايلر أكثر واحد يعرف يقيم لاعيبته، لأنه هو أكيد عايز يكسب فهو الأدرى وهو صاحب القرار.

 مع رحيل مين من الأجانب؟
 

أنا شايف الأقرب جيرالدو

تقييمك لبادجى وديانج وأجاى ومعلول؟
 

معلول من وجهة نظرى خارج التقييم فهو أفضل لاعب أجنبى فى مصر، وأحسن باك ليفت فى أفريقيا ومعشوق جمهور الأهلى، أما ديانج فقصة وحكاية ورواية ومستقبله هيبقى كبير وتسلم العين اللى اختارته فى النادى، أما بادجى لسه ملحقش يطلع اللى عنده.

رأيك فى فكرة التعاقد مع كينو أو سيرينو أو موليكا؟
 

 

كلهم لاعبيه مميزة وسوبر واعتقد واحد بس اللى هيبجى من أحد الأسماء دى أو لاعب آخر النادى ممكن يبقى عينة عليه، وإن شاء الله النادى يجيب اللاعب اللى هيطلبه فايلر.

لو تختار لاعب بديل فى مركز رمضان صبحى تختار مين؟
 

أنا أتمنى أن ينجح كابتن الخطيب ولجنتى التخطيط والتعاقدات فى الإبقاء على رمضان لموسم جديد، فأبو الفنانيين بقى لعيب مخضرم ومفيد للنادى جدا، أما مين اللاعب اللى اختاره فى لعيبة فى قطاع الناشئين مواليد ٩٩ و٢٠٠١ و٢٠٠٢ هايلين. زى صالح نصر وشادى رضوان وشكرى وعمار وعبدالمنعم.

مين خليفتك فى الملاعب اللى بتشوف نفسك فيه حاليا فى الأهلى؟
 

فى أحسن منى يعنى بس أنا اللى كنت بحب أشوفه فى الملعب حسام غالى لما كان بيلعب كنت بحبوا، وفيه عمرو السولية حاليا لاعب استايل وممتع.

المراكز اللى يحتاجها الأهلى فى الصيف؟
 

مساك وأرشح حجازى وفى وسط الملعب فى من المعارين من ولادنا أكرم وناصر وشريف وعمار والباك رايت فى بكار كويس.

رأيك الفنى لفايلر؟
 

طبعا مدرب هايل ومختلف وطموح ومقنع جدا، وشايفة مزيج من مستر فايتسا وجوزيه وهيدكوتى، وربنا يوفقه لأنه مشروع مدرب كبير فى أوروبا مستقبلا.

مع قرار التجديد؟
 

طبعا واعتقد كابتن الخطيب وكابتن محسن وأمير بصدد الإعلان عن التجديد له فى الأيام القادمة

تعليقك على تصرفات صالح جمعة ونصيحتك ليه؟
 

صالح ندعيلوا أن ربنا يهديه الأول

ترشح مين للفوز بدورى الأبطال؟
 

طبعا الأهلى ثم الأهلى ثم الأهلى بس الكورة ترجع بس.

ترشح مين فى انتخابات الأهلى القادمة؟
 

معرفش أمتى ومين اللى داخل بس لو كابتن خطيب خاض الانتخابات يبقى هو الأجدر، خصوصا وأن المجلس الحالى عامل شغل عالى جدا سواء فى الإنشاءات فى كافة فروع النادى أو الجانب التسويقى والرياضى والأسرى، كمان عجبنى جدا دور العميد محمد مرجان مدير النادى بصراحة وبعتبره الجندى المجهول فى النادى شخصية تفتخر بيها وبكونه ينتمى للنادى الأهلى.

رأيك فى هجوم بعض أبناء النادى القدامى على إدارة الأهلى وبالتحديد كابتن الخطيب؟
 

لا أقبل ذلك طبعا مثلما أجبت فى سؤال سابق أننى أرفض الهجوم على أى شخص ينتمى للنادى، فما بالك بالأسطورة بتاعتنا.

 تعاملت مع حسام البدرى لاعبا ومدربا هل تراة يستحق القيادة الفنية للمنتخب الوطني؟
 

لا طبعا لم اكن اتمنى أن يتولى مدرب القيادة الفنية مع الاحترام للجميع غير كابتن حسام فهو الأحق بهذا المنصب فى مصر بعد المشوار الطويل مع النادى الأهلى والبطولات التى حققها وتجربتة الادارية الناجحة فى بيراميدز

وهل ترى ايقاف النشاط فى صالحة ؟
 

بالتأكيد التوقف دة مش فى صالح أى حد فى العالم

بالنسبة لنادى الزمالك تقييمك لفريق الكرة وكارتيرون ؟
 

الفريق السنادى مختلف وكارتيرون نتايجة هايلة والزمالك بيأدى بشكل مميز ونتايجة هى اللى بتتكلم وانا عن نفسى اتمنى أن نهائ دورى الأبطال يبقى بين الأهلى والزمالك

وهل الزمالك كان يستحق السوبر المصرى والافريقى ؟
 

الافريقى اة اما المحلى الأحق بة كان الأهلى بصراحة وان شاء اللة تتعوض فى افريقيا

مين بيعجبك فى الزمالك ؟
 

ساسى طبعا لعيب ذكى ممتع وعندو الحلول وفارق جدا مع الزمالك من اول ماتعاقدوا معاة وبن شرقى لعيب طبعا كويس جدت

احسن اجنبى ؟
 

فايلر

احسن لاعب؟
 

عبدالله السعيد وفى الأهلى معلول والزمالك ساسي

هل تلقيت اى عرض من الزمالك طوال مشوارك الكروى فى الأهلى ؟
 

مرتين وكان عن طريق لاعب كبير فى نادى الزمالك ومسؤول ووسيط

وماذا كان ردك ؟
 

قولتلهم شوفوا حد غيرى ماينفعش هو فى حد يقدر يغير أبوة أو والدتة وقفلت الموضوع خالص سواء بجد أو بهزار !!

لدرجة أن فى شخص محترم بدون ذكر اسمة صديق النجم الزملكاوى دة كان بيرن عليا فى البيت فكنت كل ماسمع صوتة اقفل التليفون

رايك فى بركات وتريكة بصفتك كنت مدربهم ؟
 

تريكة ظاهرة لن تتكرر فى تاريخ الكرة المصرية والعربية والافريقية اما بالنسبة لبركات فتريكة نفسة كان يقول بركات هو الرئة بتاع الفرقة حتى جوزية كان رغم عشقة لتريكة وجمعة ومتعب وفلافيو الا انة كان عندو بركات دة حاجة تانية خالص

بمناسبة وائل جمعة هل جوزية فعلا مكنش بيحبة وغير مقتنع بية ؟
 

وائل جمعة هو فى حد فى مصر ولاافريقيا عمل انجازات جمعة وبعدين جوزية اصلا هو اللى جاب جمعة وطوال وجود جوزية ف النادى وائل مقعدش ربع ساعة حتى على الدكة فى عهدة هل لو جمال عبد الحميد وحسام وابراهيم حسن وايمن منصور استمرواو فى الأهلى كان أثر سلبا فى بطولات الزمالك ؟

نادى الزمالك ناد كبير بس بالارقام هذا الرباعى اثرو جدا فى تاريخ الزمالك وبالتالى وجودهم فى الأهلى كان هيبقى مكسب للأهلى وخسارة للزمالك بالطبع بس الكورة بقى نصيب

رأيك فى مصطفى شوبير ؟
 

بالنسبة لمصطفى شوبير فهو موهبة كبيرة وانا بتوقعلوا أنة هيبقى حارس مرمى منتخب مصر والنادى فى وقت قصير جدا بل أنا بتوقع انو سيتخطى نجومية وبطولات والدة اما عن احتياج الأهلى لدعم فى مركز حراسة المرمى فدة قرار الادارة ومستر فايلر فقط

ماذا يمثل لك ايمن شوقي؟
 

ايمن شوقى دة اخويا وصديق العمر ونجم كبير ومهاجم فذ واتظلم بصراحة ومخدش حقة تماما

مين تأثرت بيه قبل وانت صغير فى مركزك محليا وعالميا؟
 

الخطيب وصفوت عبدالحليم وفاروق جعفر وعالميا بلاتينى والرباعى دول كانوا ادارجية كوره

علاقتك بالتوأم ؟
 

اخواتى واطيب خلق اللة واتمنى التوفيق ليهم واستغربت من الهجوم عليهم من الجانب الابيض بسبب تصريحاتهم الاخيرة أنهم بيشجعوا النادى الاهلى..اومال المفروض يشجعوا مين دول معجونين أهلى بس العصبية بس السلبية الوحيدة عندهم

من افضل من رئيس للنادى الأهلى عبر تاريخه؟
 

ناس كتير طبعا الفريق مرتجى وكابتن صالح وكابتن عبدة صالح الوحش اما من وجهة نظرى كابتن حسن حمدى كان رئيس نادى بنكهة اوربية بصراحة رغم أن الكابتن حسن وك صالح وك والوحش التلاتة ظلمونى فى الكوره

 كثيرون يقارنو بين المايسترو والخطيب ودايما الكفة ترجح كابتن صالح سليم ؟
 

طبعا كابتن صالح اسطورة وتاريخ كبير فى النادى بس بردو كابتن خطيب اسطورة وكاريزما وشاطر ولايقل فى النجومية ومحبة الجمهور عن المايسترو أو حتى المرحوم مختارالتتش

هل ترى أن الجوهرى يعد من اساطير النادى ام تدريبة للزمالك إثر على شعبيتة ؟
 

طبعا رمز من رموز النادى الأهلى وقيمة كبيرة وتاريخ عظيم وتدريبة للزمالك طبعا اثر بشكل كبير فى علاقتة بالجميع فى النادى ولكن الاحتراف ساعات بيبقى شر مش خير

وهل اثر فيك كابتن الجوهرى ؟
 

مع الاحترام لكابتن الجوهرى وانا لعبت معاة فى النادى والمنتخب وروحت كاس العالم ٩٠ معاة بس من وجهة نظرى اللى اثر فى حياتى الكروية وشايفة مدرب عظيم مخدش حقة زى كابتن جوهرى وكابتن انور سلامة والشيخ طة هو المرحوم الكابتن السايس شخصية عظيمة بكل المقاييس

ومن افضل مدرب مصرى فى التاريخ ؟
 

كل الاسماء اللى ذكرتها عظيمة بس فى كابتن شحتة وكابتن طة بصرى وحاليا كابتن مختار مدربين كبار طبعا

ولكن الانجازات والاعجازات والمدرب التاريخى واللاعب المميز فبدون تفكير المعلم حسن شحاته

تعليقك على ازمة اسامة نبيه الاخيره؟
 

 مع نادى غزل المحلة وربط واقعة التفويت باحرازك هدف فى النادى الأهلى وانت فى نادى الأوليمبى ؟

اسامة شخصية جميلة ومدرب محترم وكان لعب مميز طبعا وهو بس خانة التعبير والناس ماصدقت ومسكت فى الكلمة ودخلتوا فى فيلم كبير وألفاظ صعبة زى التفويت وماشبة ذلك واعتقد أن اسامة اعتذر لجمهور الزمالك والمحلة واتمنى الناس متمسكش للناس على الواحده

اخيرا تحب تقول اية لجمهور الأهلى ؟
 

اقولهم انتوا أعظم جمهور فى العالم وفانلة نادينا تمنها غالى قوى وانا عن نفسى لحم اكتافى من خير النادى وخيركوا واى لاعب يمشى من النادى هو الخسران وبتمنى ليكوا دوام الصحة والانجازات


لا توجد تعليقات على الخبر
اضف تعليق

مسابقة التوقعات


توقع مباريات أمم أفريقيا